中環出更：交流變申訴 立會區會議員齊轟政府「無料到」
立法會多名議員尋日同沙田區議會開閉門會議，會上就沙田區多個議題作討論。據了解，交流會變咗申訴會，兩級議會嘅議員狂呻政府部門回應敷衍，只係畀啲公開資料大家就算數！
區議員潘國山回覆時話會上互相交流意見，反映咗好多實際個案，但最神奇係，原來立法會議員得到嘅資訊同區議員差唔多，真係估唔到！另一議員李永成更笑，會上最大共識係大家都冇法向政府攞料，但大家都希望可以做好啲地區工作，以政策便利市民，好關注沙中線係咪真係可以局部開通。
僅少數立會議員坐足全程
交流會主要討論五大事項，包括沙田區公私營殯葬設施、翻新博康邨街市、港鐵沙中線、重整巴士路線，以及領展再出售公屋商場同街市對屋邨居民生活帶來嘅影響等。不過，有區議員就反映只有小量立法會議員坐足全程，覺得交流唔夠深入，希望下次新界東嘅議員都坐齊，唔係中途走咗去。不過，連區議員都投訴資料唔夠，睇嚟政府要認真諗吓，點樣回應議員查詢喇！
卓妮