政情：重遊古廟 劉國勳回味童年𢭃利是
立法會議員劉國勳早排去咗元朗大樹下天后古廟，幫手拎籤文同敲鼓，佢話對呢項工作唔陌生，因為以前每逢農曆新年都會去做，係咩驅使佢咁熱心於寺廟事務呢？
幫手添香油打鼓
劉國勳就話，善信求籤後要執籤同拎籤文，添香油後亦要打鼓，呢啲工作就需要人代勞，往往善信見到小朋友幫手後都會封利是，再加上農曆新年期間特別多善信，𢭃到唔少利是，所以細個每逢農曆新年都會去幫手喎。
佢就話呢啲油水位毋須爭崩頭，因為細路仔只要有利是收就開心，唔會講究數量多定少，只要有得做就開心，佢一直到讀大學先無再幫手。今次重遊舊地，佢又客串回味童年回憶，難怪佢都猛話開心喇。