政情：陳岳鵬返馬會新工 第三次做譚志源下屬
有時工作上夾開嘅拍檔，真係唔多想轉人。政制及內地事務局前副局長陳岳鵬（Ronald）上屆離任後，曾經離港讀書，之後一直都冇透露讀書後會去邊度工作。尋日就有消息傳出，佢將會出任賽馬會嘅行政經理，主要負責內地事務，下星期一生效。咁啱Ronald嘅前老細、政制局前局長譚志源（Raymond）依家出任賽馬會公司事務執行總監，將會係Ronald嘅直屬上司，即係Ronald已經係第三次做Raymond下屬，真係相當有緣分。
齊處理佔中政改工作
Raymond當年出任特首辦主任時，已經好賞識時任南區區議員嘅Ronald，二○一○年搵咗佢加入特首辦擔任特別助理，聽講當時搞到一手提攜Ronald嘅匯賢智庫主席葉劉淑儀唔多高興添！Raymond做咗政制及內地事務局局長後，又再次搵Ronald做其政治助理，後來仲升埋做副局長，當時年僅三十三歲。
兩人喺政府共事期間，經歷過處理佔領行動及政改方案等勁棘手嘅工作。Ronald喺政府換屆時，因為要去美國嘅名牌大學讀書，提早咗少少離開政府，而Raymond換屆時同樣決定不再留任政府，可謂共同進退。
陳話同譚係最佳拍檔
政界不時傳出Ronald唔做官後，可能會去選立法會，但Ronald反而去咗外國讀書，期間同Raymond一直有聯絡。兩人去年中就曾經相約食早餐，其時Raymond仲向Ronald笑指「立法會唔適合我哋」，睇佢哋兩個依家都選擇去馬會工作，睇嚟的確對立法會冇乜興趣！
Raymond接受查詢時話深慶得人，自己一直都想有Ronald做拍檔，大讚對方係非常好嘅人才，無論去邊都係呢個諗法。身在日本嘅Ronald越洋回覆查詢時話，同Raymond合作無間，係最佳拍檔，對於新崗位好雀躍同期待喎！佢哋兩個講到咁肉麻，睇嚟真係離唔開對方咁喎！