中環出更：議員申領宣傳品爭議 行管會設小組檢討
立法會議員可以申領立法會開支津貼，用作印製與立法會事務有關嘅宣傳品，連同租金、職員薪金等開支，議員每年可申領逾二百五十萬元嘅辦事處營運開支償還款額。
不過，立法會行政管理委員會（行管會）發現，有部分議員申領嘅宣傳品有爭議，決定成立小組作檢討。
執正準則 唔會追溯過往案例
行管會尋日舉行會議，會上通過成立小組，檢視議員申領宣傳品嘅準則。因為過往發現部分議員宣傳品偏離立法會事務，例如有立法議員孖住名不見經傳嘅助理，而呢位助理係有心落地區服務嘅，做法存在爭議，所以決定就此成立小組作檢討，睇吓未來議員申領津貼時，宣傳品嘅規格有冇需要收窄。行管會主席梁君彥會見傳媒時就話，今次會議主要係傾內部事宜。
據行管會成員透露，今次並冇特別針對個別議員，小組嘅成員亦都包含建制、泛民、直選及功能界別議員，設立小組目的係想執番正將來嘅申報準則，唔會追溯過往有爭議嘅案例。
卓妮