政情：馮英倫五月做爸爸 幫囝囝改定名
豬年伊始，本地政圈就有喜事。發展局局長政治助理馮英倫尋日攜眷出席一個新春團拜活動，仲宣布太太已有身孕，今年五月就要生個金豬仔，同生肖又係屬豬嘅馮英倫組成雙豬父子檔。雖然馮嘅囝囝仲有約三個月先出世，但佢就已經諗定囝囝個名，一反其父母當年好即興咁以颱風「愛倫」為佢改名嘅做法。
馮英倫打算為囝囝取名「以仁」，期望佢將來係一個有愛心嘅人。至於太太到時係開刀生定自然分娩，馮就話目前仲未決定，又話太太懷孕頭三個月經常嘔吐同無胃口，身體狀況喺近呢一個月先至較為穩定，得以同佢一齊出席農曆新年公開活動。
唔會對囝囝施加學業壓力
講到囝囝將來教育問題，馮英倫就話依家啲學童壓力好大，佢會倣效自己父母，唔會對下一代施加學習上嘅壓力。雖然馮希望囝囝可以開開心心咁向自己嘅興趣發展，不過佢就話，前提係要先啟發囝囝嘅語文能力，因為如果對語文有所掌握，對自學就大有幫助喎。