政情：亂講杜拜係首都 毛孟靜被利敏貞指正

話說會議審議有關新設嘅香港駐曼谷同杜拜經濟貿易辦事處，由向來衣着惹人關注嘅商務及經濟發展常任秘書長利敏貞解答提問。未知毛孟靜係咪又想展示其學識廣博，就大聲話曼谷為泰國首都，杜拜係阿聯酋首都，結果遭到利敏貞立即指正話錯喇！

毛孟靜當刻就一面錯愕，反問新嘅經貿辦唔係設喺杜拜咩，但聽到利敏貞糾正阿聯酋首都位於阿布扎比時，佢仲死撐話一時間唔記得杜拜係邊個國家嘅首都，結果又錯多次，事關杜拜根本唔係任何一個國家嘅首都囉。

苦撐話譚文豪更早發現錯誤

而利敏貞就袋錢落毛孟靜個袋，話杜拜係阿聯酋最興旺同商業化嘅城市。不過毛孟靜就唔太欣賞，反指本身為民航機師嘅議員譚文豪比利敏貞更快發現其錯誤喎，真係跌落地都要揦番拃沙。