政府早前向立法會提交《國歌條例草案》，立法會將成立《國歌條例草案》委員會審議草案。根據立法會文件，截至本月十三日上午十時，共有六十名議員加入該委員會，包括三十八名建制派及二十二名民主派議員，兩大陣型「冧友」情況再現。究竟仲有冇議員會加入呢個委員會，就要睇埋今日截止報名後先知嘞！
現時立法會六十九名議員當中，唔計立法會主席梁君彥，只有八名議員未有加入該草案委員會，當中建制派及非建制派議員各佔四人。沒有加入的建制派議員有剛分娩嘅新民黨容海恩、自由黨鍾國斌、勞聯潘兆平同經民聯石禮謙，而非建制派方面就有醫學界議員陳沛然同三名民主黨議員尹兆堅，林卓廷同鄺俊宇。
林卓廷接受查詢時話，民主黨未有要求所有該黨議員加入委員會，立法會現時仍有好多議題需要跟進，包括追究律政司司長鄭若驊，以及運輸及房屋局局長陳帆，故需要作出分工。但佢明言該黨對條例草案有很多疑慮，係咪支持草案仍要視乎當局點樣回應議員嘅提問同訴求。