政情：向張建宗打小報告 泛民狙擊楊潤雄
教育局喺舊年恢復小三全港性系統評估（TSA），由於TSA過去爭議不斷，立法會教育界議員葉建源上個月底就喺立法會大會就有關TSA事宜提出口頭質詢，要求教育局局長楊潤雄交代有關TSA嘅數據，但當時就被楊拒絕，搞到民主派聯署去信畀楊嘅上司、政務司司長張建宗表達不滿。
議員提問 事隔半月未回覆
不過，原來件事仲有餘波，事關立法會內務委員會尋日開會，內委會副主席話已經再次向張建宗反映事件，批評楊態度敷衍，促請張建宗跟進咁話。
喺尋日嘅內委會上，副主席匯報佢同主席與張建宗會面嘅情況時就提到，楊潤雄喺上月三十日嘅立法會大會上拒絕向葉建源提供有關小三TSA嘅數據，未有回應葉建源嘅提問，而且態度敷衍。
追問張建宗會點跟進事件
二十四名民主派議員雖然已就事件去信張建宗投訴楊潤雄，但佢最近同張建宗會面時，亦都有再向張建宗反映事件，仲有叫張建宗要跟進。
葉建源就話當日只係要求教育局提交數據，惟至今未有回覆，認為政府應檢討一下佢哋回應議員問題嘅情況。佢仲追問究竟張建宗對事件有乜嘢諗法，將會點樣跟進？內委會主席就回應，佢會再向張建宗表達議員嘅意見，睇吓張建宗有乜嘢睇法，而議員都可以繼續喺相關事務委員會跟進咁話。睇嚟件事都唔會咁快畫上句號喇！
查實成件事緣於葉建源喺一月三十日立法會大會就小三TSA提出質詢，要求楊潤雄交代有幾多間學校申請全級評估同學生數目等資料，同埋詢問當局會唔會要求學校申請全級評估前，要先諮詢全校教師同全體家長意見。不過楊潤雄當時就拒絕提供有關數據，話面對不願公開與政策實施無關嘅數據時會感到好無奈，仲反駁如果公開數據，不排除會被人自行解讀，為學校帶來不必要嘅壓力。楊今次真係口舌招尤，自己攞嚟衰喇！
新正頭都未過，楊潤雄就畀人打小報告，如果佢再唔醒醒定定，老老實實畀議員一個交代，睇怕佢嚟緊都冇運行喇！