中環出更：中樂團立會表演盧偉國挑學生機
好多人都知道立法會工程界議員盧偉國（WK）係音樂發燒友，精通多種唔同嘅樂器，咁啱尋日嚟立法會舉辦嘅午間音樂會表演嘅係中樂團，可謂開正WK嗰瓣，佢唔單止即場表演咗二胡同琵琶，仲分別挑戰吹笙同琵琶嘅同學即場獨奏，不過學生一啲都唔失禮，輕輕鬆鬆就完成挑戰！WK仲話雖然玩過好多樂器，但笙同揚琴係少數佢唔識嘅樂器，而佢又覺得笙好好聽，所以先叫學生表演吓啫！
陳維安敲《有隻雀仔跌落水》
立法會秘書長陳維安就似乎鍾意打鼓多啲，表演完咗就即刻去咗鼓前亂咁搞啲掣，搞到啲鼓走晒音，要啲同學仔幫手先調番啱個音，之後仲敲咗首《有隻雀仔跌落水》！原來陳維安中學時都學過鋼琴，仲考到六級，但考八級就「肥咗佬」，之後就冇學喇！唔知前日情人節，佢有冇善用自己音樂去氹老婆抑或送花就算？佢話已經係老夫老妻，所以情人節只係喺屋企食咗餐飯，仲話情人節花貴，所以送花通常都係老婆生日先送咁話。
講番音樂會，旅遊界議員姚思榮就話唔識樂器，反而佢以前啲同學就玩足幾十年，玩到今時今日每次同學聚會都會帶埋樂器出嚟，一邊食飯一邊演奏，原來佢學校有要求學生喺跳舞、樂器、唱歌三選一，點都要揀一樣參加，但姚思榮就話對音樂興趣唔大，當年揀咗較為輕鬆嘅唱歌，及後都冇乜再練，所以依家出席聚會，多數就係負責聽喇！
負責聽嘅仲有教育界議員葉建源，佢話細個時只係學過口琴，但其實佢最想學係笛，當年曾經買過啲相關嘅書嘗試自學，可惜吹極都吹唔啱就放棄咗，畢竟佢細個時礙於屋企環境，根本冇機會去學，依家人大咗都冇乜動力再學，反而鍾意聽多啲咁話。
卓妮