政情：凸肚鄭泳舜孖聶德權備戰渣馬
一年一度嘅渣打馬拉松喺嚟緊嘅周日舉行。一向都有跑開馬拉松嘅立法會議員鄭泳舜（Vincent）就同同樣都有跑馬拉松、有「三耳局長」之稱嘅政制及內地事務局局長聶德權一齊練跑。不過Vincent明顯地比未做立法會議員前肥咗，佢跑步時個肚腩就隨住佢嘅步伐上下晃動，真係睇見都感覺到其腰間嘅震盪。
話說Vincent將佢同三耳局長練跑嘅短片上載至社交網站，片段中兩人就講吓跑步經。三耳局長話跑過三年馬拉松十公里賽同兩年半馬賽事，仲曾經幫過香港防癌會籌款，覺得好有意思咁話。
跑前要食得清淡啲
而Vincent就教路，話跑馬拉松前唔好打邊爐或食生冷嘢，要食得清淡啲、多啲食澱粉質食物同注意作息等。佢仲提醒大家，跑步前搽啲潤膚露，減少身體同衣物嘅摩擦。
片段中，兩人喺海濱長廊跑步時，突然有一名男子瞓低咗，究竟發生乜嘢事？Vincent就喺短片貼文中賣關子，話「若遇突發要冷靜」，欲知下文就要留意喇！