政情：陸頌雄唔驚輸 新年流流去執書

仲買攝影集偷師

前日（7日）大年初三「赤口」，好多人都按傳統唔會去拜年，以免新年流流嗌交。陸頌雄都冇去拜年，但改去書局掃特價書，佢話百無禁忌，唔係好信「輸唔輸」呢啲嘢喎，仲話執晒啲書就唔怕輸嘞。最後佢買咗四本同歷史、文化有關嘅書，因為工作太忙，呢類書冇時效性，可以慢慢睇，仲話四本都係特價書，埋單都只係八十元。

陸仲話，平時睇書多數以社會科學為主，而作為攝影愛好者，佢仲會買攝影集，喺影相時可以用嚟參考吓啲構圖。佢記得最初學影相時會透過繪畫他人啲攝影作品，用嚟記低構圖同甫士，等以後見到類似場景時就識點樣去影喇。