政情：處男落區 吳永嘉靠利是引人
農曆新年假期剛過，地區人士已經紛紛落區向市民拜年送上祝福，就連非直選出身嘅立法會功能界別議員都唔敢怠慢，講嘅係工業界（第二）議員吳永嘉（Jimmy）尋日年初四到訪深水埗區，實行獻出第一次處男落區。
Jimmy去年十二月先告別自由身加入政黨，作為政黨新人，尋日就跟黨友「雙料議員」梁美芬及工程界議員盧偉國落區，齊齊向市民拜年，佢仲講到明係呢生人第一次落區，非常興奮，但佢就話唔知要做啲乜，估計都係講新年賀詞。之後到訪酒樓向茶客拜年，見佢都好受歡迎，尤其以小朋友為主，但佢話其實啲街坊唔認識佢，只係畀佢手上裝有朱古力金幣嘅利是所吸引啫。
赤口行水塘 熱出一身汗
賀年食品唔少得糕點，就連向來身形瘦削嘅Jimmy都食咗唔少蘿蔔糕。不過，佢話最近已經打咗三次羽毛球，年初三「赤口」更同朋友去咗行城門水塘，當日天氣熱，出咗一身大汗，所以已經夠晒運動量去消耗喇。