中環出更：林卓廷對聯寫「不如歸去」叫鄭若驊下台
律政司司長鄭若驊因「放生黎智英，唔告梁振英」被全城炮轟，民望更係長期插水。因為律政司決定唔對前特首梁振英UGL案提出檢控而狙擊鄭嘅立法會議員林卓廷（阿廷），就連過年都唔放過鄭，特登寫咗副對聯「不如歸去，造福香江」畀鄭，寓意叫鄭下台，佢仲話打算寄副對聯去律政中心送畀鄭咁話。
街坊話唔好放過鄭
阿廷尋日喺一個聚會上話，佢開街站時有唔少街坊向其反映對鄭若驊嘅不滿，仲叫佢唔好放過鄭，因此佢就寫咗呢副對聯，而佢都會考慮向鄭提出不信任動議。
講番寫揮春，阿廷就自爆佢三、四年前開始寫時啲字好醜樣，所以就特登買咗幾本字帖嚟參考，仲不停練字，而佢其中一本參考書就係書法家顏真卿嘅字帖。不過佢就講笑話自己寫緊嘅並唔係「顏體」，而係「難睇」，但會用誠意搭夠，所以啲字再醜都唔怕喎。
身高六呎四嘅阿廷又話曾經落區扮財神，當年因為無乜人識佢，街坊都唔知佢生得咁高，有人以為佢係踩高蹺，特登揭開佢件財神衫，發現原來佢真係咁高，反而嚇親，真係搞笑。
卓妮