中環出更：老友催婚成功 史立德明年初嫁女

原來去年佢哋幾個家庭一齊去日本過年，Allen一對子女都有去，一眾老友就趁機「發功」，催佢個女結婚，終於得咗。今年佢哋又再拉隊去日本玩，目標就變成催Allen個仔史昊洺結婚。

香港島婦女聯會會長鄺晶晶（Akiko）及丈夫潘偉業、香港表廠商會副會長劉燊濤同太太Daphne都有入場。Akiko帶埋三名子女一齊入場，幸福洋溢，佢笑稱已有兩女一仔，原本覺得夠晒數，不過最近有相士話佢兩年後會生多個仔，結果老爺潘少忠聽完勁開心，梗係叫佢生啦！但係佢之前三胎都係開刀生，要認真諗清楚先得。至於已有兩個囝囝嘅劉燊濤又再追到一個仔，預計今年年中生，恨生女恨到流口水嘅Daphne笑住叫Akiko試吓兩年後係咪真係生仔，係嘅話佢就去睇吓個相士喎。

梁青華（右）及太太楊少萍（左）拍拖入馬場沾旺氣。

劉燊濤（右一）及Daphne（右二）將再添隻「豬仔」，潘偉業（左一）及鄺晶晶（左二）都戥佢哋開心。

梁青華養狗後去少咗旅行

講起過年，有人鍾意咩生肖年就養咩動物，香港鐘表業總會顧問梁青華就話自己唔會，自從屋企養狗之後，就好少養其他動物，依家有三隻狗仔，連旅行都去少咗，所以過年鍾意喺香港Hea住過，例如入戲院睇電影，享受難得清閒嘅時光咁話。

卓妮