政情：立法會出2.4萬月薪 聘LC 1司機
立法會秘書處最近刊登廣告，招聘貴賓車私人司機，每月薪酬加埋現金津貼逾兩萬四千元，司機嘅其中一個職責就係要揸立法會主席LC 1專車喇！據悉，現任司機已工作逾十年，即將退休。
招聘廣告列明，貴賓車私人司機其他主要職責包括駕駛立法會行政管理委員會擁有或租用車輛、保持車輛清潔同性能良好、協助裝卸車輛載運嘅物品同協助執行辦公室雜務，司機需要着制服同不定時工作。入職薪酬每月兩萬四千多元，並按年增薪至兩萬五千多元，每個月有現金津貼，現時津貼就有四百七十五元。獲聘人士會按合約條款受聘，為期三年，完成合約而工作表現良好仲可以續約，亦有約滿酬金，應徵者要喺本月二十七日前遞交申請。
需懂中英兩語
睇落薪金同福利都吸引，但亦有一定嘅招聘條件，初步入選嘅申請者要考筆試同路試、修畢中五或有同等學歷、要持有效私家車、輕型貨車同埋私家巴士牌、要有十年經常駕駛經驗、非常熟悉全港街道路線同地點，同埋中、英文口語能力都要良好等等。睇嚟要做司機唔止靠對手，仲要靠埋把口喇！