政情：梁美芬年宵掃貨 戴豬帽拜早年
豬、豬、豬，全部都係豬。梗係喇，臨近農曆新年，送狗迎豬，喺賀年禮品當中，豬簡直係無處不在，好似立法會議員梁美芬尋日亦喺所屬政黨嘅年宵攤檔掃咗批豬貨返嚟，包括一頂帽、一大隻暖手豬公仔、一對豬仔錢罌，仲為佢嘅愛犬Curtis買咗幾隻豬仔，返到議員辦事處，唔單止將啲「戰利品」擺晒出嚟，佢仲戴埋豬帽同大家拜早年。佢戴豬帽個樣又幾趣怪（口架）！
葉建源擺檔寫揮春
另外，立法會教育界議員葉建源尋日按慣例喺立法會擺檔寫揮春，佢話寫過好多唔同嘅揮春，連中英夾雜、畫公仔都試過，有立法會職員聽到就即刻叫佢寫張「發過『豬』頭」，但個「豬」字就要畫出嚟，雖然佢話未畫過豬，但結果都算畫得唔錯。佢又話教育局局長楊潤雄亦託佢寫張「家肥屋潤」，一嚟個「潤」字可以襯番佢個名，二嚟個「家」字仲要突出「豕」字嘅部分，回應今年係豬年咁話。
另一議員葉劉淑儀經過時就話：「嘩！你咁醒，喺度擺檔，要收租o架喎！」葉建源見狀即場問葉劉有乜嘢揮春想要，但葉劉就冇乜心水，最後葉建源就送咗張「心想事成」畀佢，葉劉就即刻回禮，寫番張「心想事成」送畀葉建源，仲話寫開隸書，所以啲字咪肥啲囉！