政情：聽唔到表決鐘聲 盧偉國被嘲要帶助聽器
立法會財務委員會尋日開會審議其中一項撥款申請時，有多名泛民議員提出臨時動議，所以議員都要坐定逐個投票，點知工程界議員盧偉國（WK）就話聽唔到鐘聲，仲被嘲要帶助聽器添！
喺立法會進行表決時，只要有議員要求記名就要響表決鐘，當時盧偉國就提出記名要求，會議室內亦都照常響起表決鐘，點知隔咗一陣，WK就煞有介事舉晒手，問點解唔響鐘喎。
WK反指泛民嘈住晒
其實當時表決鐘已經響咗一段時間，所以坐WK隔籬嘅黨友梁美芬都即刻同佢咬耳仔，唔知係咪提醒佢喇！不過已經阻止唔到畀泛民議員取笑，紛紛大叫「咪響咗囉」，其中議員林卓廷更叫佢帶助聽器添，但後尾林卓廷就話講嘅係耳機啫！
而WK今次衝出嚟嘅行為雖然成為笑柄，但佢仍然不失霸氣，堅持咗幾句話鐘聲太細聲，就改口話大家唔出聲就聽到喎，把握機會話番泛民嘈住晒。