政情：行年宵遇狙擊波叔落荒逃

話說波叔尋日喺維園出席活動後，順便行年宵，起初唔少檔口見到有官員經過，都紛紛向波叔招手，而波叔都表現友善，同咗唔少檔主打招呼，仲先後幫襯咗一啲學生檔、本地檔，買咗幾個豬公仔、布袋、斜揹袋等，但都有啲檔口並唔係掛住做生意，好似有兩個來自政黨社民連嘅人士上前狙擊，話要送一個「萬億攬枕」畀波叔，揶揄興建人工島係耗資不淺，叫波叔「自己食番」呢筆數咁話。

無視訴求聲音 安然掃貨

當時波叔企喺一個檔口前邊，冇理會到示威人士，繼續睇吓該檔口有乜嘢貨品，但好快場內保安、警務人員都嚟到，隔開咗波叔同示威人士，結果波叔對示威人士嘅訴求好似完全聽唔到咁，繼續施施然安心買嘢，最後喺一個檔口買咗個大福袋，入面有文件套、咕o臣等。但兩名示威人士縱被隔開亦冇放棄狙擊，不斷喺旁邊叫波叔「食番個萬億元攬枕」，又質問佢點解唔肯接、唔回應訴求。

登座駕遭阻攔 改搭港鐵

可能見群情洶湧，波叔買完福袋都冇再久留，沿路行到維園年宵近港鐵天后站出口時，一度有意登上其紅色座駕離開，不過兩名示威人士緊隨其後，仲喺呢個時候衝上前擋喺車門前，誓要將「萬億攬枕」送畀佢，佢眼見上唔到車就決定棄車，改為走去搭港鐵離開。

查實高官推出惠民政策同措施嘅話，又點會畀人狙擊先得o架，依家正正因為政府施政「堅離地」，唔單止興建人工島，近日極具爭議嘅收緊長者綜援申請門檻，以至派四千蚊派到天怒人怨，就算波叔早前認衰話抵鬧，都撲熄唔到民憤，佢喺本月底就會發表新一份財政預算案，若果建議大幅加稅同削減福利嘅話，睇怕民憤大爆發呀！