唔少人都會趁農曆新年長假期出外旅遊抖吓氣。近日沙中線紅磡站又爆工程醜聞，再加埋四千蚊嘅「關愛共享計劃」連番甩轆，牽涉其中嘅運輸及房屋局局長陳帆同財經事務及庫務局局長劉怡翔就一於少理，齊齊喺今日開始放假，唔知佢哋係咪想避風頭呢？
政府憲報尋日公布，陳帆同劉怡翔一齊喺今日起開始放假，直到年初七（11日）先返工，抖足九日。兩個局最近連環爆鑊，沙中線嘅工程醜聞爆完一單又一單，繼被揭發鋼筋接駁有問題之後，最新就爆出部分工程紀錄唔見咗，同埋未經政府同意下擅改施工方法。除咗沙中線，政府派發四千蚊嘅安排混亂，補完一鑊又一鑊，尋日首收表格又被揭發收表箱冇上鎖。
家陣發生咁多事，但係陳帆同劉怡翔兩人係一局之首，竟然喺風頭火勢，仲有閒情逸致放假過新年，丟低啲工作唔理，簡直做壞晒榜樣。好多市民會趁新年期間去轉吓風車，祈求新一年行個好運，唔知佢哋放假會唔會都咁做呢，順便諗吓計仔補鑊。
喺陳帆同劉怡翔放假期間，身為運房局副局長蘇偉文同財庫局副局長陳浩濂就要兼任局長嘅工作。眼見依排兩個局都接二連三咁爆鑊，睇嚟兩位副局長都要打醒十二分精神（目及）實啲，咪又甩轆嘞！
卓妮