中環出更：社企酒樓賣舊派點心 趙傑文靠老友記幫手
依家好多人都搞社企，而傑出青年協會（傑青會）主席趙傑文正計劃開設社企酒樓，佢話依家好多酒樓嘅點心都係嚟自食品工場，食客就算光顧唔同嘅酒樓，點心都可能係嚟自同一源頭，佢話若然可以提供「雞球大包」、「芋角」或「芝麻卷」等漸趨式微嘅舊派點心嘅話，應該好受老饕歡迎，但現今仲掌握呢門手藝嘅師傅，都有番咁上下年紀，所以係要靠老友記嘞！
其實，趙傑文依家經營緊嘅社企餐廳由廚房至樓面，清一色都係銀髮族。佢話雖然勞工保險係要畀貴啲，但老友記員工勝在有豐富閱歷同經驗，尤其擅長設計適合糖尿病人嘅特殊餐單。對於政府執意提高長者綜援嘅申領門檻，令到積蓄唔多但又無法重返職場嘅老友記，日子相當難捱，而佢認為長者福利政策都係維持舊制比較恰當。
應屆傑青籲注重行山禮儀
傑青會會員陳嘉賢就覺得好多銀髮族依然老當益壯，而佢爸爸陳國民就同好多本地工業家一樣，年屆七旬仍幹勁十足，延遲退休已成社會趨勢。佢又話姑勿論幾時退休都一定要及早買醫療保險，否則將來老來無醫，晚景就會好淒涼。
應屆傑青吳俊霆係登山勇士，年紀輕輕就成功攀登七大洲八大最高山峰，就連世界之巔嘅珠穆朗瑪峰都征服埋，到底佢會唔會就此計劃退休呢？佢話其實仲有山峰尚待挑戰，而最新嘅目標就係馬特洪峰。佢又話自沙士疫情之後，港人强身健體嘅意識高咗，以致近年郊野多咗好多行山愛好者，導致人多路窄嘅情況不時出現，他呼籲大家務必注重行山禮儀，亦謹記要帶走垃圾，以免破壞自然。
卓妮