港府去年初推出舊私家車更換電動車「一換一」計劃，至今僅有三百多輛車申請，佔合資格更換車輛不足百分之七，成效不彰。港府昨又跪低，宣布即日起放寬申請條件，由車主需連續三年或以上係舊私家車登記車主，減低至連續一年半即可。不過立法會議員批評充電車位不足、部分私人屋苑無法安裝充電裝置等問題，先係電動車無法普及嘅原因。環境局局長黃錦星認衰，稱正同兩間電力公司商討，為安裝充電器嘅屋苑提高電力。推行電動車咁多年，連基本配套都未跟上，唔知黃錦星搞邊科？
