政情：咪兜前違規合照 劉業強認衰
近年唔少議員帶團參觀立法會時，都會有團友違規喺咪兜前合照，一嘗做議員嘅滋味，卻令帶團議員犯咗規。尋日議員劉業強帶同數位訪客喺一樓參觀，一路有講有笑，其中兩人更拉埋劉喺咪兜前合照。劉回覆查詢時就話係一時大意唔醒起喎！
帶朋友參觀 一時醒唔起
佢話，尋日約咗幾位已退休嘅朋友食飯，之後就帶佢哋參觀立法會。由於朋友未去過，覺得好新鮮，所以周圍影咗好多相。當去到一樓咪兜時，佢哋叫到就行埋去合照，一時醒唔起，耍冧話下次唔會嘞。
查實近年愈來愈多人唔守規矩，立法會秘書處已放咗告示喺咪兜，指明大樓內採訪位置只供立法會議員、政府官員使用，其他人士不得使用作任何用途，包括與議員合照。唔知點解大家都睇唔到呢？