中環出更:鄭松泰代長者多X謝羅致光

政府收緊長者綜援申領門檻事件激嬲全城,尋日先宣布暫緩實施不參與「自力更生綜合就業援助計劃」會被扣減二百元綜援金嘅安排。立法會議員鄭松泰尋日喺立法會福利事務委員會特別會議上批評事件時忍唔住「爆粗」,話勞工及福利局局長羅致光聲稱二百元懲罰金及安排長者見勞工主任係幫助六十至六十四歲人士搵工,鄭話「如果我冇聽錯的話,我真係代嗰班長者多×謝佢!」

列席嘅羅致光隨即澄清:「主席,佢真係聽錯,我冇咁講過。」面對有人爆粗,委員會主席鄺俊宇自然要處理。鄺話自己聽得唔清楚,要求兩人重複有關言論,鄭第二次發言時就冇再講唔應該講嘅字喇!鄺呼籲議員即使有不滿,亦要注意言行。

何啟明直斥計劃「好笨×」

工聯會議員何啟明在會議尾段發言時,又再爆粗俗說話。佢回應羅致光提到自力更生支援計劃下,相關綜援申領者兩年內可獲最高二千元津貼,何直斥做法「好笨×」。鄺俊宇一度要求何再重複講多次,何就收咗火,只稱係「好笨嘅做法」。

第一手消息請下載on.cc東網iPhone/iPad/Android/Windows Phone Apps