政情：墟市活動鄭泳舜大開食戒
一直有玩開三項鐵人嘅立法會議員鄭泳舜（Vincent）自進身立法會後，甚少參加比賽，更忙到冇乜時間返區議會添！Vincent尋日出席介紹深水埗新春美食墟市活動，佢一到場後就由頭食到落尾，舐盡雞蛋仔、牛丸、牛肉餅同埋粢飯，連煮包粢飯啲食材都唔放過，難怪佢睇落愈嚟愈有「福氣」啦！
參加完慈善跑「太餓」
Vincent咁食得，原來係前晚到尋日中午都冇食嘢，尋日朝早仲去參加慈善跑，所以餓到「大開食戒」，但食得又唔一定識煮嘢食。佢即場同檔主示範煎牛肉餅時，只係幫手落吓油，整粢飯時更加顯得雞手鴨腳，畀在場嘉賓笑係「地獄廚神」。不過佢堅持自己有入廚房，最叻煮餐蛋麵喎！