政府舊年為咗補鑊，透過關愛共享計劃向合資格市民派發四千蚊，點知申請階段甩晒轆，衰到表格唔夠派，要市民自備白紙去民政諮詢中心列印，再一次激起民憤。走出嚟撲火嘅財經事務及庫務局局長劉怡翔，只識指示下屬加印一百萬份申請表應付民怨，為咗補鑊，被人鬧爆下世做樹都在所不惜。政府近年成日將創新科技掛喺口邊，結果官方申請仍舊依賴傳統紙本模式，官員與其疊埋心水下世做樹，不如諗下點利用科技惠民好過啦！
