政情：派錢甩轆 田北辰嘲陳茂波唔識接波
財政司司長陳茂波（波叔）正就新一年度嘅財政預算案諮詢各界意見，早前拍片叫市民交個波畀佢，又叫網民畀意見，佢會接波，點知籌備咗近一年派四千蚊嘅關愛共享計劃，一派表就甩轆，畀市民鬧爆，就連立法會議員田北辰尋日都喺Facebook上載咗張相，嘲波叔唔識接波呀！
田北辰喺Facebook po咗張接波相，仲留言話係佢上年同一百個小朋友踢波，學有所成做咗「門晨（神）」，仲話「財爺，咁樣先叫做正面接波喎。」擺明係嘲諷波叔喇！田北辰又話早前佢所屬嘅組織同財爺見面，交咗寫滿建議嘅波畀財爺，希望財爺真係正面接到佢哋個波。
網民話波叔玩閃避球
呢張相出咗之後，有網民亦揶揄波叔玩嘅係閃避球，要政務司司長幫佢補漏拾遺同執手尾，亦有網民留言鬧爆「政府話派嗰四千蚊，畀呢個波玩到謝，最好叫呢個波，去下深水埗，旺角，自己問下啲市民有乜嘢意見， 應該好精彩」；另有網友話「財爺唔搞搞震都已經保佢大……」。睇嚟呢個波真係好唔掂。