政情：公院爆廠叫醫護捱義氣 陳肇始被轟虛偽離地
依家正值流感高峰期，搞到啲公立醫院爆廠，啲前線嘅醫護人員做到冇停手，氣都冇碇抖，但醫管局就只係叫佢哋「捱義氣」，梗係怒火沖天喇！就連立法會醫學界議員陳沛然（Pierre），同埋做過食物及衞生局局長政治助理嘅陳凱欣都鬧埋一份，Pierre仲二次創作，將流行曲改詞，鬧爆食衞局局長陳肇始「叫捱義氣，才是虛偽」！
公院十個煲兩個蓋，前線醫護人員長期唔夠，而喺流感高峰期，醫管局淨係加病床唔加人手，班醫護人員早前上街怒吼後，醫管局仍然唔加人手，反而搵班明星拍片打氣。不過就似乎撲唔熄前線啲怒火，仲畀人鬧多兩錢重。
陳沛然改詞寸床位不足
醫管局搵明星拍片，同時係公立醫院醫生嘅Pierre就將《終身美麗》改詞，講番依家醫院面對緊嘅問題。佢就寫話「急症多一位，床位未找到」、「如果責任非愛情，加SHS（特別酬金計劃）都不會高興」，開宗明義講到話依家醫療配套唔夠，但政府就只用SHS去解決問題。講完醫院，Pierre仲發炮鬧陳肇始，話佢「入職可終生美麗，陳局長勾勾手指發誓，落區前線排隊敬禮，叫捱義氣才是虛偽」，仲寫埋「高官自信，穩固地位」嚟諷刺佢添！
陳凱欣促推流感券分流
雖然醫管局畀人狂鬧，但陳凱欣就公開力撐，話從士氣角度去睇嘅話，個出發點係好。之不過依家做咗立法會議員嘅佢，就話普遍人睇到就會覺得少少「離地」喎。佢話希望政府可以正視員工士氣低嘅源頭，建議政府可增設雙倍加班津貼、同埋提供流感券分流病人到私家診所，減輕公立醫院嘅壓力，而唔係純粹搵一兩個名人出嚟講加油。同時，佢仲喺社交網站發貼，話政府唔使增加培訓醫護人手，反建議不如用啲錢去搞藝員訓練班。
雖然Pierre嘅歌詞唔啱音，而陳凱欣撐完醫管局，跟住又鬧「離地」，立場彈出彈入，但無論點都好，大家都係好明確咁反映依家醫院嘅情況。火頭早就燒埋身，陳肇始唔係仲唔知死，唔諗計撲火呀？