院舍照顧員小強和小明於員工休息室對談，小強問：「小明，你知道作為院舍照顧員，要注意嘅職業安全及健康要點係乜呢？」小明回答：「我知，每日都要進行連串嘅扶抱工作，最重要當然係安全地進行體力處理操作啦。」
小強答：「無錯。我哋每日進行體力處理操作，包括提舉、扶抱同搬移院友。體弱或行動不便嘅院友，需要我哋去扶持步行或者站立，佢哋上落床或輪椅時都需要我哋協助。當我哋無保持正確姿勢，工作時會好容易引致腰背痛楚或扭傷。長期體力勞動、不正確姿勢或超越個人能力嘅體力處理操作，可引致筋骨肌肉勞損。」
小明說：「咁預防扶抱工作時受傷，有乜嘢方法啊？」小強回答：「我哋做體力處理操作，應該優先採用僱主提供嘅機械輔助器材，例如吊床同扶抱機等。院舍透過進行風險評估所制訂嘅工作守則，我哋都需要嚴格遵守，亦都需要認識體力處理操作嘅潛在危險。」
小明說：「何謂正確扶抱姿勢呢？」小強答：「避免過度彎腰、扭腰、扭動手腕或者頸部等等肢體動作，因過度用力會容易受傷。使用機械輔助器材嘅時候，謹記正確使用方法。如果超越自己能力範圍，就要向上司或者同事尋求進一步協助啊！」小明說：「明白晒。小休完我哋一齊開工啦！」
職業安全健康局
www.oshc.org.hk