區議會換屆選舉將於今年年底舉行，而政府已經喺上月遞交咗區議會一般選舉分界建議報告書，決定維持最大爭議嘅長洲南北兩區合併建議，所以現時兩名長洲選區嘅區議員李桂珍同鄺官穩將會兩個只能活一個，戰火更提早喺日前嘅長洲街坊代表選舉上演，仲有機會影響到三月長洲鄉事委員會（鄉委會）換屆結果添！

現時離島區議會有十八個議席，當中有三席同長洲相關，因為長洲不但劃分成兩個選區，更有長洲鄉委會主席成為當然議員。而要成為鄉委會主席就先要成為街坊代表，先有資格參選同被選成為主席，所以日前舉行嘅長洲街坊代表選情非常競烈，一共有六十五人競逐三十九個街坊代表席位。

當日選舉投票率高逾五成，六十五名候選人分為兩大陣營，分別係以鄺官穩為首嘅「長洲動力」，硬碰李桂珍同長洲鄉委會主席翁志明嘅「社群聯盟」，最終上述三人都以最高票三人嘅姿態順利連任，李桂珍同翁志明陣營仍然掌握鄉委會中嘅主導權。

另外，鄺官穩喺日前嘅選舉中票數較四年前增加一成，有接近二百票增長，反觀李桂珍雖以二千多票蟬聯「票后」，但大跌接近二百七十票，跌幅有一成一，同鄺官穩差距唔夠二百票。而李桂珍喺議席合併下爭取連任區議員，好大機會要再次硬撼鄺官穩，街坊代表呢場前哨戰，的確為李桂珍響起警號。

李桂珍爭取連任現暗湧，但現屆鄉委會勢力都有所減弱，因為翁志明喺街坊代表選舉中同樣跌票，得票減少百分之七，鄉委會副主席吳文傑更連任失敗添，再加上改革勢力今次議席增長咗八席，需要更團結先能夠主導到三月鄉委會換屆結果。而李桂珍本身都係鄉委會執委，如果要避免硬撼鄺官穩，都可以改同連任多次嘅翁志明爭奪鄉委會主席，成功就可以憑當然議員延續其區議員生涯。

李桂珍接受查詢時話一直無停過服務長洲，直言呢個係其終身事務，除非自己行唔到咁話，至於以乜嘢身份去服務都並非重要。至於會否爭取喺鄉委會更上一層樓，佢就話暫時未諗要再研究，如果對工作有利就會去做喎。聽佢咁講似乎心大心細緊喎，睇嚟翁志明都唔能夠掉以輕心嘞！