政情：逼住板間房成長 謝凌潔貞學會體諒
今時今日學生有好多課外活動、興趣班可以揀，有時做父母嘅都唔知點幫啲仔女揀好，但民政事務局常任秘書長謝凌潔貞早前出席一個制服團體嘅活動時話，要揀就應該畀啲仔女參加至少一項制服團隊，等佢哋學吓紀律、社交禮儀同埋點樣同人互相遷就。
謝太話年代已經唔同，佢嗰個年代多數人都有好多兄弟姊妹，佢細個時六兄弟姊妹一齊住板間房，迫使佢哋學識遷就同體諒他人，不過依家就多數「一個起、兩個止」，每個小朋友得到嘅空間同關注都多咗，相比下冇咁識得遷就其他人，所以就要喺制服團體裏面學嘞！
後悔兩個女冇參加制服團體
佢講到自己細個都有參加過童軍，但可惜兩個女就冇參加過制服團體，仲話如果可以重新揀一次，一定會畀兩個女參加，事關佢個女試過參加露營，當中有啲同學自以為是，唔肯同其他人合作，搞到煲燶食物，全組人冇飯食，由此可見團隊合作、社交重要性，一定要畀個女學多啲咁話。