中環出更：開騷前喉嚨發炎 楊立門睇西醫急救
最近天氣時冷時熱，一唔小心就好容易病。卓妮尋日見到前「AO歌王」、中華廠商聯合會（廠商會）行政總裁楊立門一臉倦容，講話陰聲細氣，原來係喉嚨發炎。佢苦笑話壓力好大，因為下星期一、二接連兩日要開個人演唱會，驚好似某歌星咁因病而唱唔到，咁就大件事喇！
楊立門話從未試過在開騷之前病倒，今次可能工作忙、壓力大，所以不敵病魔。佢已睇咗中醫，但係冇明顯效果，遲啲要去睇西醫急救先得。
廠商會新嘗試 承辦教育展
廠商會尋日一班骨幹齊集，預告今年將籌辦一系列活動慶祝該會成立八十五周年，會長吳宏斌、副會長史立德同徐晉暉分別交代有關細節，包括同香港幾家大學合作，有系統地保存廠商會及本港工業發展的珍貴歷史資料，將來電子化後與市民分享，仲有將贊助全港公開電競比賽，以支持政府推動香港成為國際電競中心。
其中比較特別嘅係承辦已有十五年歷史嘅香港國際教育展，係廠商會舉辦工展會或食品展之外，首次涉足其他展覽領域。身兼展覽服務公司主席的徐晉暉話該會主辦嘅工展會深入民心，不過佢哋準備作新嘗試，跳出框框挑戰其他嘅展覽活動，承辦教育展希望為中學生嘅升學或者就業，提供更多的選擇。
同場仲有副會長盧金榮、常董劉健華等人。盧金榮負責睇廠商會旗下嘅檢定中心，今年適逢中心成立四十周年，都有好多事要搞。咁多大項目要做，難怪吳宏斌話廠商會要升級轉型，以全新品牌形象同大家見面喇！
卓妮