中環出更：黃國健自爆 行船過年眼濕濕
大時大節最重要一家人齊齊整整，但唔少行業假期都要繼續上班，甚至要離鄉別井，團圓都有難度。海員出身嘅立法會議員黃國健（KK）就大嘆，以前試過行船過新年，年三十晚真係會掛住家人到眼紅紅，估唔到佢有咁感性一面！
KK話當年有家室都繼續行船，過年時零舍傷感，尤其記得年三十晚返房自自然就眼紅紅，至於船上嘅團年飯雖然比平日豐富，不過都係無得講究，有乜食乜喇！KK又話，船上甚少有新鮮食物，當中最缺蔬菜，最記得有次由歐洲返廣州，成船人上岸食菜膽雞鍋，食晒所有菜而剩番雞，搞到畀人鬧浪費。
尋日為工聯會一年一度嘅長者團年宴，分三日宴請過百名獨居長者聚會，工聯會榮譽會長林淑儀同丈夫、立法會議員黃定光都係座上客，仲有稻苗學會會長黃傑龍（Simon）、立法會議員麥美娟同何啟明等。
黃傑龍撐保留火鍋文化
近期網上熱議火鍋係咪無文化同應該消失，Simon就覺得文化係雅俗共賞，好似古典音樂都唔會與流行曲比較，再彈流行曲無文化而應消失喇。佢更認為，火鍋嘅歷史係僅次於燒烤，同埋最重要都係好食，而且連歐洲都有芝士火鍋，各地嘅火鍋口味、原理都各有不同，睇嚟火鍋背後藏有唔少學問喇。
至於何啟明就自言對食唔講究，好似上年去法國探望留學當地嘅太太，幾乎餐餐都食越南湯河，因為夠平咁話，仲話太太平日為咗慳錢，以食三文治為主，所以太太一返香港就會幫佢增磅喎。
卓妮