政情：連納智返西九睇BB出世
西九文化區戲曲中心尋日正式開幕，數年前因為健康理由及要照顧患病嘅太太而提早一年辭職嘅西九文化區管理局前行政總裁連納智，都現身觀賞開幕劇目。拄着拐杖嘅佢笑指自己嘅健康幾好，仲企得到，今次特登嚟睇戲曲中心開幕劇目，形容返嚟西九感覺好奇妙。
有份參與已好開心
佢話西九文化區係佢嘅BB，未能工作至戲曲中心開幕，都有少少唔開心，但呢個係大項目，有份參與其中已好開心。依家佢仍住喺悉尼，今次返嚟除咗嚟戲曲中心，仲去過大館等地方，會玩多幾日先至返去。
講番戲曲中心，係文化區內首個地標式表演藝術場地，開幕劇目演出前仲舉行咗開幕典禮，為已故國學大師饒宗頤親筆題字嘅「戲曲中心」揭幕。西九文化區管理局董事局希望，戲曲中心日後可以推廣傳統中國戲曲文化，培育新演員，吸引新觀眾。