中環出更：玩#20YearChallenge 岑智明驚嘆冰川融化急速
呢排好多人都玩#10YearChallenge，大家嘅着眼點可能係驚嘆歲月如飛，或者保養得宜好似「凍齡」咁，但係有冇發現人類正生活喺危機當中？
天文台台長岑智明日前喺Facebook上載咗佢十年前嘅舊照，大家都見到佢頭髮由黑變白，尋日佢又上載咗幾張相，仲話覺得擔心，同埋話「更有意義嘅 #10YearChallenge、#20YearChallenge 或者 #NYearChallenge」。
點解？事關佢九七年同一五年都去過法國冰川Mer de Glace，差不多廿年之間，發現融冰嘅速度令人震驚。九七年仲可以企喺冰川上影相，一五年已經冇可能嘞！佢話正正因為氣候變化同全球暖化搞成咁。
網友睇完感憂心
兩幅相對比好大，唔少網友睇完都覺得憂心，有網友直指「地球生態已經病入膏肓，人類如何面對全球氣候變化和怎樣應對？這是我們每個地球人的功課。」全球暖化所帶嚟嘅問題好嚴重，十年或廿年已變化得好緊要，試諗吓，N年後會變成點？
卓妮