政情：歷DQ兼坐監 羅冠聰終大學畢業
中學生要考入大學當然要付出相當多嘅努力，但入到大學都唔代表一定可以順利畢業，好似香港眾志常委羅冠聰就喺嶺南大學文化研究系讀足六年，對於考舊制嘅佢嚟講，順利的話大學只係需要讀三年，依家足足多咗一倍時間，好彩尋日佢終於收到校方正式通知，仲喺Facebook上宣布終於畢業。
一波三折 讀足六年
羅遲咗咁多年先畢業都可以理解嘅，事關佢喺二○一六年當選立法會議員，雖然最終被取消資格（DQ），但相信做議員都用咗佢唔少時間。其後佢前年又因重奪俗稱「公民廣場」嘅政府總部東翼前地一案而被判監，所以依家雖然畢業，但點都稱唔上順利，甚至可謂一波三折添。
其實香港眾志唔少成員讀大學都要延遲畢業，好似同羅一齊被判監嘅香港眾志秘書長黃之鋒當時亦需休學，所以至今依然讀緊公開大學社會科學系。至於前香港眾志常委、喺浸會大學修讀政治及國際關係學系嘅周庭，去年都曾經因為參加立法會補選而休學，結果今年年頭都話自己正加緊腳步，一個學期要修六科，務求盡快畢業咁話。