政情：拒區會傾UGL案 張永森「釋法」捱轟
律政司司長鄭若驊「放生黎智英、唔告梁振英」遭全城炮轟，被議員狙擊嘅戰線已蔓延至區議會。深水埗區議會有民主派議員早前動議討論前特首梁振英涉及任內收取澳洲企業UGL五千萬元一案，但遭主席張永森以冇迫切性為由而唔准傾。尋日開大會時，有議員再提呈加議程，並獲出席嘅過半議員支持，惟張又行使主席權，唔接納提呈，其蠻橫作法激怒民主派，群起炮轟張「釋法」濫權，閹割議會功能。
泛民斥濫權 閹割發聲權利
上月底，該區議會十一名民主派議員根據會議常規入討論文件，但張永森拖拉到前日先通知動議人、公民黨議員伍月蘭，話冇迫切性唔討論。為此有八名議員喺尋日大會上出奇招，以發表聲明為名，查實就係另類討論，一人一句就UGL案表達意見。伍月蘭直斥張濫權，閹割議會發聲權利，削弱議會基本功能，剝奪議員提案權。民協議員何啟明更拍枱大罵，話政治係眾人之事，批評張剝奪議員提案權，反問區議會邊度寫明有迫切性先講得？
建制引述《條例》撐張裁決
區議會副主席、民建聯議員陳偉明就引述《區議會條例》，話區議會只就地方行政提供意見，支持主席裁決，呼籲唔好再借此作政治炒作。張永森就話，有智慧嘅人唔會動輒就指摘他人，暗寸民主派議員「冇智慧」，並以鄭若驊做擋箭牌，聲稱鄭會喺今日（16日）出席立法會接受議員質詢，月底又出席立法會司法及法律事務委員會會議，認為事件對當區居民生活冇迫切性影響咁話。
隨後民協議員譚國僑就根據會議常規提呈，要求把UGL案加入議程，喺十名民主派議員同埋報稱獨立嘅甄啟榮支持下，提呈獲得通過。點知張永森話，常規亦列明提呈獲通過後，主席「可以」決定是否接納，英文是「May」，佢決定唔接納。此言一出，何啟明即高叫「主席濫權」，斥張自行「釋法」，其他民主派議員見狀亦跟上前包圍主席枱，張宣布休會五分鐘，並喺民建聯議員鄭泳舜及陳偉明護送下離開會議室。
唔知張永森係咪跟立法會主席梁君彥學過吓，估唔到「冇迫切性」放喺區議會都適用。查實大家都認同法治係香港嘅核心價值，係咪值得喺區議會討論就見仁見智，但係既然提呈都獲通過，張永森夾硬唔批就確係做得太過「肉酸」嘞！