中環出更：馬浩文爸爸木雕聞名於世 自嘲有基因冇手藝
內地知名嘅少壯派山水畫家申曉國早前喺香港舉行個人畫展，展場就喺中國茶文化國際交流協會會長楊孫西位於觀塘嘅私人會所，日前舉行開幕儀式時，香港各界文化促進會執行會長馬浩文都有到場。講起文化造詣，做金融、地產投資嘅佢自爆，爸爸馬海豐係雕塑家，擅長動物木雕，不過佢笑稱自己有藝術基因，但冇手藝喎！
馬浩文話，爸爸在生時喺歐美國家攞過好多全球大獎，曾經喺家鄉汕頭開木雕工藝廠，都頗有名氣，不過爸爸比較早過身，所以香港人未必識咁話。
楊孫西嘅次女楊莉瑤（Juliana）一早就到場打點，佢依家負責打理屋企嘅茶生意，經常喺福建、香港兩邊走，睇住佢哋喺武夷山傾力打造嘅茶工場旅遊特色小鎮項目。講起飲茶，Juliana笑稱咁大個女未試過正正式式飲一杯咖啡，咁多茶種之中，對屬於烏龍茶嘅大紅袍情有獨鍾，有時覺得悶悶哋，都會玩啲變化，例如自製奶茶或檸茶，比起市面飲開用紅茶沖製嘅港式奶茶，味道更加清新。
周伯林冀畫展促進中港交流
中國畫學會香港顧問周伯林同埋藝術發展公司老闆陳齊傑都喺度，事關佢哋聯手主辦畫展。周伯林笑笑口話，希望透過畫展促進中港藝術交流。講講吓，佢自爆同申曉國都係內地大畫家吳悅石嘅弟子，多咗一段師兄弟情緣，所以更加要瞓身推廣喇！
楊孫西就形容申曉國係京城畫壇嘅後起之秀，年紀唔大，但功力好深。佢笑稱有人話香港嘅藝術界藏龍臥虎，查實北京先至係培養最多藝術家嘅地方咁話喎！
卓妮