政情：馬逢國冀暫緩加牌費撐電影業
體育、演藝、文化及出版界議員馬逢國係電影製作同發行人，尋日討論一項有關電影製作嘅牌照費用時，佢就大嘆廿年前電影業好景又蓬勃，聽落有啲唏噓喎。
大嘆當年較好景
立法會資訊科技及廣播事務委員會尋日討論修訂《娛樂特別效果（費用）規例》的費用建議，增加對煙火等特別效果物料嘅牌照收費。馬逢國諗起廿年前，曾為業界爭取呢條條例，令業界由偷偷摸摸變得有規管。當時香港冇專業人員，要派人去外國學習，同埋引入專家，不過嗰陣時行業比依家好景好多。
佢認為，今次增加收費後只令庫房每年增加十幾萬元收入，比在場嘅官員月薪仲低，建議政府暫緩增加收費，以發放支持電影業界嘅正面訊息。
商務及經濟發展局常任秘書長（通訊及創意產業）梁卓文就話，上次增加收費已經係五年幾前，現時建議增幅又唔超過通脹水平，睇嚟馬逢國今次要成功爭取有難度噃！