政情：鄉郊選舉 朱凱廸全軍覆沒
新一屆鄉郊代表選舉由上星期日起，一連三個周日舉行。立法會議員朱凱廸早前聯同南區區議員司馬文等人組成「綠色鄉村約章」並且參選，不過就全軍覆沒。至於爭取連任屯門良田村村代表嘅立法會議員何君堯，則以八票之差險勝。
朱凱廸等六人參加鄉郊選舉，但朱遭取消資格，而參選上水鄉嘅廖偉濂就提名不足，所以到最終只有四人出戰。
司馬文率先喺上星期低票落敗，前日嘅選舉中，參選北港嘅何潔儀、海下David Newbery同浪徑Herve Bouvresse都同樣落敗，其中Herve Bouvresse更係連任失敗。
何君堯驚險連任
至於何君堯由一一年起擔任良田村村代表，過去兩屆均喺無對手下自動當選，今次係佢首次面對挑戰，最終有驚無險，以七十九票擊敗獲得七十一票嘅何多明，成功連任。另外，上月網傳惡村長阻警入村抄牌，涉事嘅北區區議員兼粉嶺圍村代表彭振聲就以五百零五票高票當選。