政情：驚新公園變「開咪」熱點 黃大仙區會防患未然
旺角行人專用區舊年「殺街」後，大批街頭表演者陸續轉到其他區繼續「開咪」，令唔少地區居民飽受滋擾。黃大仙區議會似乎都驚咗呢班大叔大媽，即使鑽石山綜合發展區內嘅「活水公園」最快都要三年後先至落成，但係早幾日區議會開會時，都關注有乜方法阻止啲人唱歌跳舞，實行防患於未然咁話。
要求房署裝噪音評估機
咁擔心，原來係有原因嘅。該區區議員李東江話，依家黃大仙港鐵站出口位置，不時有阿伯拎擴音機喺度唱歌，擔心日後活水公園會淪為佢哋嘅「表演」場地。早前一班黃大仙區議員去咗成都視察當地以水為主題嘅公園，發現當地部門喺公園內設有噪音評估機，假如有人發出過高分貝聲響就會響警號，以防噪音滋擾，所以區議員就要求負責活水公園嘅房屋署，研究日後喺新公園裝設添！
不過當日出席嘅房署總建築師詹秀儀就大潑冷水，話見唔到香港有呢啲噪音評估設備，仲話新公園內有有蓋嘅多用途空間，有人唱歌都唔驚喎，即係擺明唔理喇！活水公園內有大磡村具代表性的飛機庫、機槍堡及石寓三項建築物，並有淨水展示區，內有淨水過濾系統及淨水池塘，料在二二及二三年逐步啟用。
卓妮