車廠維修部主管榮哥巡經焗油房時，看見準備為私家車噴油的謙仔，遂向他的工作位置走去。榮哥：「謙仔，你唔係諗住戴個普通口罩就開工呀？」謙仔：「梗係唔會啦，我一陣會搵條毛巾包埋啲頭髮！」
榮哥：「咁唔掂喎，你個普通口罩根本隔唔到啲化學物質。你長期吸入，皮膚又吸收，會好傷身。輕則有機會引致皮膚炎、眼睛灼傷、頭痛、暈眩、嘔吐和腹瀉；重則有機會引致肺癌、腦部受損、阻塞氣管疾病、損害腎臟肝臟……」
謙仔：「有冇咁誇呀？」榮哥：「主要因為油漆含有損害健康嘅物質，例如溶劑、樹脂和顏料，而有啲顏料同底漆仲含有鉛或者其他重金屬，所以一啲都冇誇張。」
謙仔：「不過你又放心，上個月公司安排我去診所照肺，我個肺清到差不多零瑕疵，真係講你都唔信，哈哈哈！」
榮哥：「你上個月先入嚟學師，你個肺梗係清啦！我以前學師果時個師傅就係赤膊上陣，無遮無掩噴油，搞到啲同事成日聞到噴油味，又臭又攻鼻，個師傅早幾年因為肺癌過咗身。所以你一陣記住着好所有裝備、開啟焗油房抽風系統同閂好門先開工。」
謙仔：「但係公司畀果件全身式保護衣同呼吸面罩好唔襯我個潮人形象囉……」榮哥：「年輕人，貪生怕死先係MAN呀！」
職業安全健康局
www.oshc.org.hk