政情：鄭松泰求加「假」 挑動張宇人神經
立法會尋日就討論無法律約束力嘅「檢討假期政策」議員議案，原議案原本要求將中國人民抗日戰爭勝利紀念日列為法定假期，其中議員鄭松泰鬧爆政府涼薄，仲建議增加母親節翌日假期，以顯示「百行以孝為先」。而一向為商界利益發聲，語不驚人誓不休嘅飲食界議員張宇人（Tommy）反嘲鄭松泰係咪畀議辦放假。
鄭批收緊長者綜援資格涼薄
鄭松泰喺會上發言時批評「涼薄」，話近日政府將申領長者綜援合資格年齡由現時六十歲，聲都唔聲提升至六十五歲，而打工仔希望有多一日假期，政府都唔肯。佢仲話香港應有二十日假期，又建議增加母親節翌日假期，因為耶穌受難節翌日都係假期，母親受難翌日亦應放假，以體現「百行以孝為先」，而「修身、齊家、治國、平天下」，所以假期亦應由家庭出發，以社會為根本咁話。
Tommy聽完鄭發言之後就話部分議員批評人涼薄、點樣衰係好容易，反問議員係咪一到假期就關閉佢哋嘅地區辦事處唔做嘢，如果佢哋做先，佢都好歡迎咁話。跟住佢仲話要取消五一假期，因為只係工人放假，「我哋中小微企老闆都要返工」。佢嘅建議唔知會唔會又挑動打工仔嘅神經，引起打工仔反彈呢？