政情：楊岳橋開會冇影 議案撻Q

根據《議事規則》，提出動議嘅議員需要喺立法會主席叫喚時起立動議，換言之如果議員不在席，就無法提出動議。而喺尋日下午四點幾，以不記名投票方式通過勞工界潘兆平嘅「檢討假期政策」議案，正當大家準備討論AY嘅「檢討單程證政策」議案時，立法會主席梁君彥就宣布話由於AY不在席，所以無法提出動議，仲宣布埋休會添！

辯稱睇緊國歌法記者會

喺休會後嘅幾分鐘，AY現身會議廳外，正當佢同人稱建制派班長嘅商界議員廖長江一齊行入會議廳時，唔少建制派都隨即圍住佢，當中民建聯劉國勳就同佢講話自己準備咗發言，依家搞到佢冇得發言，仲做埋手勢話「你個議案冇咗喇」，而新民黨葉劉淑儀一見到佢，仲即刻指住佢話「撻Q啊你，去咗邊啊你」。

後來AY解畫，話當時佢就喺辦公室，睇緊政制及內地事務局有關《國歌條例草案》嘅記者會直播，所以冇準時落番嚟會議廳提出議案。佢強調事件係個人責任，仲因為自己嘅疏忽大意而向市民同埋準備咗發言嘅議員鞠躬道歉，又承諾會深刻檢討，日後唔會再犯同樣錯誤。佢仲話未來唔會停止關注單程證問題，嚟緊會爭取喺今年內就改革單程證制度方面提出私人草案。對於今次事件嘅教訓，AY就用咗「一心不能二用」嚟總結，話就算有兩個重大議案，都要諗清楚要做啲乜。

累范國威冇得提修正案

其實今次有四位議員就議案提咗修正案，其中新民主同盟范國威（Gary）一直好關注單程證問題，尋日中午仲特登開個記者會提及自己嘅修正案，咁大鑼大鼓都係想引起市民嘅注意，同埋可以正式喺大會度講，點知畀AY一鑊翹起，變咗粒聲都冇，簡直係累街坊喇！

Gary就話有啲失望，但日後透過其他途徑跟進，包括提出議員議案，而佢嘅黨友譚凱邦就喺Facebook 貼文話：「立法會咁大鑊……準備咗咁多嘢講單程證，竟然……」有網友直情話冇眼睇，另一名網友仲話成件事搞到咁好核突。擺明係條氣好唔順呀！