中環出更：郵輪碼頭如死城 邱騰華死撐達標
政府斥資逾八十二億元興建嘅啟德郵輪碼頭啟用至今逾五年，但人流疏落，猶如死城。多名立法會議員尋日喺立法會炮轟政府浪費資源，提出有關質詢嘅紡織及製衣界議員鍾國斌批評整個碼頭一半時間都冇被使用，一年只有十個活動喺嗰度舉辦，「仲唔係浪費資源？」要求政府促請營運商做好啲；飲食界議員張宇人更直指現時碼頭嘅商戶有如「吊緊鹽水」，認為如果營運商生意額不達特定指標，政府就應該「換人」。
商務及經濟發展局局長邱騰華就死撐，話啟德郵輪碼頭一四年郵輪停泊架次有二十八次，一七年有一百八十六次，使用碼頭人次喺一四年有十三萬人次，到一七年已有五倍增長，已達二○二三年預期嘅指標，又話現時碼頭已有一半日子有郵輪停泊，已超過當年預算，「話大部分時間空置係與現實不符」。而現有七個商舖亦已出租，一個有欠租問題同法律糾紛，強調碼頭興建嘅主要目的係接待郵輪，附屬商業區係用嚟支援到港郵輪同旅客。
吳永嘉倡經營跨境直升機
體育、演藝、文化及出版界議員馬逢國質疑碼頭使用率差強人意，否則唔會出現租務糾紛；工業界議員吳永嘉亦建議當局發牌經營跨境直升機服務，畀高端旅客可直接乘直升機到碼頭上船，但邱就話運輸及房屋局有考慮喺全港各處直升機停泊嘅可能性，係咪可以喺碼頭停泊就要由該局研究。
卓妮