中環出更：胡惠儀妙喻螺絲似成功男人背後嘅女人
依家做生意，個個都話要創新，有冇諗過做乜嘢產品唔使玩創意呢？早前卓妮喺一個晚宴上同香港螺絲業協會主席胡惠儀（Shirley）講起呢個話題，佢話螺絲係傳統行業，唔使創新，事關佢哋好少自己設計螺絲，多數係客戶設計之後交畀佢哋做。佢笑笑口話螺絲雖然不起眼，但係冇咗佢又唔得，佢哋都唔介意扮演隱藏嘅角色，就好似成功男人背後嘅女人咁喇！
Shirley話其實螺絲行業好闊，香港叫做螺絲，但係內地同台灣都叫做「緊固件」，一早已超越咗傳統螺絲釘嘅範疇印象。雖然佢哋冇得自己設計新穎螺絲，但係喺生產過程都可以搞創新，以最低成本創造最高價值，做到最靚嘅效果就好似女人平時將自己收埋，好似可有可無，但係冇咗佢哋又唔得喎。
袁仕傑推廣悼念先人網
當晚係香港創新科技及製造業聯合總會嘅慶功宴，慶祝該會主辦嘅年度頒獎典禮順利舉行。主席李遠發、常務副主席呂偉、名譽顧問單銘賢、香港工業總會前主席鄭文聰同埋有「港產愛迪生」之稱嘅發明家袁仕傑都喺度。袁仕傑最近着力推廣自創嘅悼念先人網上平台，希望推動環保之餘，亦有助海外華僑利用雲端長期維繫同家族嘅親情。
李遠發就話該會啱啱向政府提交一份推動香港品牌電動車嘅建議書，希望政府喺土地及資金給予支持。佢話依家好多港商係全球知名嘅汽車零部件供應商，只需進行全球採購即可砌出一個港產品牌電動車，聽落都幾值得撐喎。
卓妮