政情：鍾國斌：自由黨唔係壞孩子

民主黨前主席劉慧卿（卿姐）尋日邀請Felix出席網台節目，卿姐提起Felix曾經講過：「我哋依家自由黨唔係壞孩子喇」，認為佢意有所指，話佢無端端噏咗呢句，仲話佢搞咗好多動作，令到外間有好多疑惑。Felix聽完隨即反駁「有咩咁疑惑啫？」仲話係外界畀佢哋嘅稱號，所以要話番畀外界知，佢哋唔係咁話。

話中美貿易戰情況好咗

查實自由黨當年被叫「壞孩子」，事出必有因。當年佢哋身兼行政會議成員嘅前黨魁多次高調批評時任特首，包括指對方小器，甚至兩次呼籲時任特首辭職，最終搞到被北京「搣柴」，連全國政協都冇得做。

另外，Felix都講起中美貿易戰，仲轉咗軚話依家情況冇之前咁嚴峻喎！之不過業界嘅睇法好似冇佢咁樂觀，Felix冇耐前都認為香港難以擺脫困境，點解佢對善變嘅美國總統特朗普咁有信心呢？