中環出更:曾做統計員 何啟明攞正牌撳鐘仔

香港每十年就會進行一次人口普查,中間又會有一次中期人口統計,兩者都需要大量統計員幫手,吸引到唔少學生去做。立法會議員何啟明以前都有兩次做統計員嘅經驗,咁啱兩次都負責唐樓地區,所以避唔到去好似砵蘭街呢啲品流複雜嘅地方,照咁講,咪係攞正牌撳鐘仔?

何啟明話,試過做砵蘭街同埋大角咀一帶嘅統計員,當中有唔少劏房,亦都有唔少色情架步。佢話做統計員要去晒所有單位,睇吓入邊有冇長期住戶,所以連「一樓一」都唔可以放過。佢諗起當時同女拍檔行孖咇,佢會挺身而出,自己入去呢類單位問,女拍檔就喺門口等。

樓梯底見到有料安全套

佢又話,呢啲地方去得多就習慣,同埋好彩身穿制服,所以都冇咩特別驚險嘅遭遇。但係記得有次經過唐樓嘅樓梯底時,見到有料安全套,當時好純情,唔知咩嚟,但係依家諗番就覺得好核突囉。佢笑稱,自己細個都住過板間房,對呢類劏房已有大概嘅認識,但統計員工作令佢認識更多唔同住屋種類,對現時嘅社區工作都有幫助咁話。

卓妮

第一手消息請下載on.cc東網iPhone/iPad/Android/Windows Phone Apps