中環出更：立會餐廳走塑 善團成員齊齊撐
近期全城熱議「走塑」，好多食肆已經停止派發即棄膠餐具，包括塑膠飲筒，但都有唔少人大呼唔方便。尋日六大慈善團體到訪立法會進行周年茶敍，活動開始前見到東華三院總理毛宇峯幫襯已經「走塑」嘅立法會餐廳，佢就覺得為環保可以一人行多一步喇。
毛宇峯初初未有發覺立法會餐廳「走塑」，皆因佢堂食同埋飲熱咖啡，佢笑稱人到三十歲開始，飲凍飲會好易病，尤其自己容易扁桃腺發炎，所以已經戒凍飲同少食辣嘢。佢覺得飲筒非必需品，而且塑膠對環境嘅影響都好大，市民應該為環境負責任。
前去參觀立法會嘅仲有保良局、仁濟醫院、博愛醫院、仁愛堂及九龍樂善堂一眾成員，非常熱鬧。仁愛堂總理黃曉妮第一次參觀立法會，大讚會議廳好莊嚴。講起走飲管潮流，喺牙科集團幫手嘅佢就唱反調話要用多啲用飲筒飲咖啡，因為可以減少接觸牙齒而變黃嘅機會，不過就可用不銹鋼飲管喇。來自台灣嘅仁愛堂主席羅台秦就話，台灣環保意識高，連飲珍珠奶茶嘅塑膠粗飲筒都已有代替品，不過佢就認為推動環保唔應該一刀切，要逐步做，令環保變成風氣先得。
藍王雲仙自攜玻璃飲管
博愛醫院總理藍王雲仙對環保就坐言起行，已經自攜飲管好多年喇，佢用嘅係玻璃飲管，容易望到入面，方便清潔污糟嘢。
仁濟醫院副主席王賢訊就建議可以送餐具畀人鼓勵市民自攜餐具，而推動走塑膠飲管後，有唔少人都想推動走汽球，因為玩汽球不但有機會造成危險，對環境傷害都好大。不過，咁樣小朋友咪少咗樣玩意？
卓妮