政情：齋影印難學嘢 張建宗籲咪做「影帝」
政務司司長張建宗（小肥張）尋日出席一個青年工作坊大談青年政策，期間講到實習工種時，就形容有種工叫「影帝」同「影后」，因為齋做影印，仲叫年輕人實習時千祈咪做「影帝」同「影后」，因為會乜都學唔到。小肥張曾出任勞工及福利局局長，唔通連佢都職業歧視，睇輕呢啲技術工種？
勉勵青年 努力可改善前途
小肥張尋日講起青年實習計劃，話計劃會提供優質工作畀青年，亦會有導師帶領青年做實質工作，叮囑實習生咪做「影帝」同「影后」齋去影印，要小心挑選實習工作，以免最後乜都學唔到。
佢仲勉勵在場青年，笑言讀唔成書先係偉人，唔好因為「讀唔成書等於冇出路」呢啲說話而被逼入死胡同。佢又舉例話，從事飲食業都做到廚神，但相反即使做醫生，都有頂尖同普通醫生之分，而政務官亦都有升職快同一世冇得升，所以前途係同努力有關，只要對任何工作投入、用功用心，機會就係留畀有準備嘅人喎。