中環出更：搵梁福元相認 劉國勳靠髮型
本港經典兒歌都有唱「世界真細小」，原居民嘅世界可能更易遇到熟人。曾經講過媽媽係原居民，而細個亦都係喺圍村長大嘅立法會議員劉國勳，之前出席一個活動時就話，自己都係半個元朗十八鄉人嚟嘅，仲細細個就已經對十八鄉鄉事委員會主席梁福元嘅髮型印象深刻咁話。
媽媽係原居民 外公做村長
劉國勳話，佢媽媽係十八鄉嘅原居民，而佢外公更係村長，外公同梁福元都好熟稔。劉國勳當日喺活動上見到梁福元，兩人合照時梁福元都即刻講得出劉國勳嘅外公個名叫鄧志林。劉國勳話，佢自細就喺唔少大時大節如天后誕等見到梁福元，對方嘅髮型就好似一個標誌，佢細細個已經好記得，長大之後從事社區工作，都係憑住梁福元嘅髮型同佢相認。
劉國勳又話，以前一去外公屋企玩就好開心，會周圍行嚟行去，爬嚟爬去，真係好多嘢玩，不過就有啲怕村入面嘅狗，因為通常都比較大隻喎。劉國勳依家生得咁高大，唔知佢仲會唔會驚村入面嘅狗呢？
卓妮